Toko Taki
Menu Click to open Menus
Home » Palanta » Giliran nan Padusi

Giliran nan Padusi

(6 Views) June 15, 2012 9:13 am | Published by | No comment

“Nampaknyo kini giliran nan padusi-padusi lo lai, Ngah!” Sorak Kari Garejoh. “Giliran manga?” Tanyo Angah Piyan. “Giliran masuak tansi!” Jawek Kari singkek. “Baa kok bantuak itu pandapek Kari? Biasonyo masalah bola nan baurus mah,” salo Tan Baro.
“Karano nan masuak tu padusi-padusi se sadonyo. Kalau den ndak salah, kini nan mauni ruang tahanan ka-pe-ka saluruhnyo padusi. Di barita hari ko lah tatangkok lo ciek lai dan masuak pulo ka situ,” baleh Kari.
“Emansiapasi mah Ri. Kalau laki-laki bisa manjadi pamimpin, padusi juo lah bisa. Kalau laki-laki bisa manjadi supir bus atau oto prah bagai, nan padusi lah ado pulo. Kalau laki-laki manjadi tukang tumbok ban, nan padusi juo lah banyak pulo. Laki-laki manjadi tukang ojek, padusi ado pulo. Pokoknyo apo se karajo laki-laki, bisa pulo dek padusi mangarajoannyo,” kato Angah.
“Kalau nan jantan-jantan santiang mamanjek, apo padusi juo bisa?” Tanyo Ajo Tondeh.
“Mamanjek apo?” Tanyo Udin Kuriak.

“Manjek kambie contohe,” jawek Ajo.
“Itu bialah karajo Ajo dan konco-konco nan diirik ilia jalan mudiak jalan. Nan padusi indak usah sato lai,” sambuang Angah.
“Tapi baruak batino lai ado nan mamanjek karambia Jo!” Kecek Tan Baro.
“Oooo, jadi iko emansipasi mah yo? Apo nan dikarajoan urang laki-laki, nan padusi juo musti bisa. Patuiklah, salamo ko kan banyak dalam kasus korupsi tu nan jantan-jantan, kini lah ampia samo banyak pulo padusi jo jantan,” hanyo itu nan dikatoan Kari sambia maangguak-angguak.
“Ado ciek lai Ri. Kalau laki-laki ado nan masuak panjaro dek ulah mambunuah, kini lah banyak pulo padusi. Minimal mambunuah calon bayinyo surang,” kecek Angah baliak.
“Itu namonyo aborsi, Ngah!” Kato Tan Baro.
“Sumbaranglah namonyo, nan pasti apo nan dikarajoan laki-laki, juo bisa dikakok dek padusi,” baleh Angah.
“Tapi, apo nan dikarajoan padusi indak bisa dek laki-laki mangarajoannyo doh, Ngah!” Sorak Uncu Labai.
“Apo tu?” Tanyo Angah.
“Hamil dan malahiakan anak!” Jawek Uncu.
“Kurang lamak pulo parasaan den mancaliak padusi masuak tansi-nyo Ngah. Takana se di den dunsanak den di kampuang,” kecek Kari baliak.
“Samo wak mah Ri. Den juo kurang lamak mancaliak padusi masuak panjaro. Apolai nan kamek-kamek rancak bantuak si anji tu ha. Tabayang se di den, badannyo dipantak rangik di dalam ruang tahanan,” semba Tacin Barain.
“Baa juo mangatoannyo lai Cin. Memang lah tibo pulo gilirannyo bantuak itu. Tangan mancancang, bahu mamikua. Salah ditimbang, utang dibayia,” kato Tan Baro.
“Tapi banyak nan alun mambayia utang lai Tan. Sabanta lai lah ka masuak pulo puaso,” tadanga suaro Uwo Pulin dari pintu dapua.
“Kok mandanga masalah utang piutang tu nyariang talingo Uwo mah,” runguik Udin.
“Baa ka indak dek Udin. Dek pitih tu urang masuak panjaro mah,” hanyo itu jawek Uwo.
Baitulah ota di lapau Uwo pagi kapatang. (eSPe St.Soeleman)

Categorised in:

No comment for Giliran nan Padusi

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>