Berita Singgalang | Palanta

Super Ongeh

Tanggal 20 January 2012

“Apo ateis Minang tu Tan?”
Sadang lamak-lamak mambaco koran ‘Singgalang’, tibo-tibo Tan Baro takajuik dek ulah Udin Kuriak batanyo. Nan ditanyoan Udin adolah barita nan memang sadang dibaconyo bana.
“Apo Din?” Tanyo Tan Baro sambia mancaliak ka kawannyo tu.
“Ateis tu apo?” Kato Udin.
“Oooh…., ateis ko maknanyo indak ado Tuhan. Pahamnyo banamo ateisme, yaitu indak maakui adonyo Tuhan. Kan lai samo-samo wak palajari wakatu sikola dulu mah,” jawek Tan Baro.
“Bukannyo animisme?” Tanyo Udin.
“Animisme apo lo ko ha. Animisme tu kalau ambo ndak salah, urang-urang nan punyo kapercayaan kapado roh-roh aluih. Umpamonyo picayo di batang baringin tu ado karajaan urang aluih. Tapi nan dimukasuik barita ko adolah paham nan indak maakui Tuhan. Jadi paja ko keceknyo sajak es-de lah punyo paham indak maakui adonyo Tuhan,” baitu Tan Baro manjalehan ka konco palangkinnyo.
“Sia paja tu Tan? Ongeh bana nyo nampak di den. Dipilinnyo pusek dek Tuhan beko baru aduah-aduahi. Atau ditahannyo buang aia gadang agak tigo hari baa pangananyo?” Uncu Labai lansuang sato basuaro.
“Iko indak ongeh lai nampaknyo doh Ncu, tapi lah super ongeh mah. Nyo sangko inyo bisa lahia baitu se? Nyo sangko bisa manjadi pagawai bantuak itu dek ulah inyo surang. Nyo sangko udaro nan diiruik duo puluah ampek jam sahari tu indak ado nan manciptakan? Tabik simbabau den jo paja ko mah,” kato Udin sambia bagatok garaman.

“Sia ayahe Tan?” Tadanga pulo Ajo Tondeh batanyo.
“Ndak lo jaleh sia ayahe dek ambo doh. Tapi nan jaleh paja ko sabana barani nampaknyo. Inyo buek lo di internet dan itu kan saolah-olah mambanggakan ka urang lain baraso den indak picayo ado Tuhan. Bak kecek Uncu tadi, dipilinnyo galang-galang dek Tuhan, ka sia nyo mangadu? Ka dokter? Kalau indak ado izin cegak dari Tuhan, indak ka bisa gai dokter maubeknyo doh,” baleh Tan Baro.
“Iko lah lua biaso nampaknyo mah Tan. Urang Minang pulo nan babuek bantuak itu lai. Di Minang ko ado palsafah, ‘adaik basandi syarak, syarak basandi Kitabullah’. Urang nan iduik di Minang adolah urang nan punyo Tuhan. Kalau indak maakui ado Tuhan, indak buliah iduik di siko doh. Bahkan di Indonesia kan lah jaleh pado Sila partamo ‘Ketuhanan yang Maha Esa’. Nah, kalau indak maakui ado Tuhan, sarancaknyo paja tu disipak se mancari negara nan indak batuhan,” kato Angah Piyan.
“Harusnyo atasan paja ko di pamarentahan mamecatnyo. Satau den untuak manjadi pagawai tu disumpah jo Alquran mah,” mangecek pulo Mak Pono.
“Itulah akibaiknyo kalau ilimu dunia nan tinggi, indak mandapek ajaran agamo sajak ketek,” sambuang Uncu.
“Paja ko memang paralu diagiah palajaran. Palajaran partamo dari atasannyo dipecat. Palajaran ka duo dari pamarentah, indak buliah mauni nagari siko. Palajaran ka tigo nan paliang gadang dari Tuhan. Bak kecek tadi, dinaiak an se galang-galangnyo agak tigo hari atau ditahan buang aia gadangnyo, baa pangananyo?” Kato Udin baliak.
Baitulah ota di palanta lapau Uwo Pulin pagi kapatang. Barita ‘Singgalang’ nan bajudul ‘Ateis Minang Terbongkar’ manjadi sumber inspirasi urang-urang tu. (eSPe St.Soeleman)

Leave a Reply

 
Advertise Here
Advertise Here

Pojok

  • + Gubernur Riau bacaruik pungkang
    - Raso tagak di balai kami pak gubernur
    + Band Bimz ingin langit biru di Riau
    - Ijau buliah langik tu, gubernur se pacaruik